پاکستان کا ریلوے نظام پرانا ضرور ہے لیکن غیر محفوظ نہیں ہے، وزیر ریلوے خواجہ سعد رفیق

پاکستان کا ریلوے نظام پرانا ضرور ہے لیکن غیر محفوظ نہیں ہے، وزیر ریلوے خواجہ سعد رفیق

وزیر ریلوے خواجہ سعد رفیق کا کہنا تھا کہ کسی کو مایوس ہونے کی ضرورت نہیں ہے، پاکستان کا ریلوے نظام پرانا ضرور ہے لیکن غیر محفوظ نہیں ہے۔جمعہ گوٹھ کا حادثہ بظاہر انسانی غلطی معلوم ہوتا ہے لیکن واقعہ کی انکوائری کا حکم دے دیا ہے، 8 روز میں مکمل تحقیقاتی رپورٹ سامنے آ جائے گی جس کے بعد سب کچھ واضح ہو جائے گا۔کراچی میں گزشتہ روز ہونے والے ٹریفک حادثے کی جگہ کا معائنہ کرنے کے بعد میڈیا سے بات کرتے ہوئے خواجہ سعد رفیق کا کہنا تھا کہ حادثہ انتہائی المناک تھا اور اس میں ہونے والے جانی و مالی نقصان پر بہت افسوس ہے، ملتان میں ہونے والے ٹرین حادثے میں ملوث افراد کو معطل کردیا گیا ہے جب کہ کراچی میں ہونے والے حادثے کے ذمہ داروں کو بھی سخت سزا دی جائے گی، اگر حادثے کے ذمہ داروں کو سزا نہ دی تو لوگ آئندہ بھی غلطیاں دہراتے رہیں گے۔ان کا کہنا تھا کہ سگنلز برابر کام کر رہے تھے، ڈرائیور نے لال سگنل کو نظر انداز کیا، حادثے کے وقت ٹرین کی رفتار 60 میل فی گھنٹہ یا اس سے کچھ زیادہ تھی جو 30 میل فی گھنٹہ ہونی چاہئے تھی۔خواجہ سعد رفیق کا کہنا تھا کہ ریلوے کے وسائل پہلے ہی کم ہیں اور حادثے میں جانی نقصان کے ساتھ ہمارا بہت مالی نقصان بھی ہوا ہے۔ انہوں نے کہا کہ ہمارے ہر مسافر کی لائف انشورنس ہوتی ہے، لائف انشورنس کے لئے پریمیم ادا کرتے ہیں۔ان کا کہنا تھا کہ کچھ خود ساختہ اینکرز ٹی وی پر بیٹھ کر عوام میں مایوسی پھیلا رہے ہیں، ہمارے ٹریکس پرانے لیکن محفوظ ہیں اس لئے کسی کو مایوس ہونے کی ضرورت نہیں۔ بلوچستان میں ریلوے کو تخریب کاری کا سامنا ہے اور ہم پر حملے بھی ہو رہے ہیں لیکن اس کے باوجود ریلوے کے نظام میں بتدریج بہتری آ رہی ہے۔

Leave a Comment

Your email address will not be published. Required fields are marked *

*